मोरङ/ मंगोल नेशनल अर्गनाइजेशन   पथरीशनिश्चरे नगरसभाको आयोजनामा पथरीशनिश्चरे वडा नं. ४ स्थित जरायो टोलमा एकदिने मंगोलवाद सम्बन्धी प्रशिक्षण कार्यक्रम सम्पन्न भएको छ । उक्त कार्यक्रम स्थानीय मंगोल समर्थक हर्कराज गुरुङको सभाध्यक्षतामा एवं एम. एन. ओ. पथरीशनिश्चरे नगरसभाका सल्लाहकार बिक्रम फेम्बुको प्रमुख आतिथ्यतामा सम्पन्न भएको हो । कार्यक्रममा विशिष्ट अतिथि नगरसभा सल्लाहकार टेक बहादुर मगर रहनुभएको थियो । 
        कार्यक्रममा विशिष्ट अतिथि मगरले मन्तव्य राख्नुभएको थियो भने प्रमुख अतिथि फेम्बुले उपस्थित लोक समुदायलाई मानव अस्तित्व, अस्तित्व र पहिचान, एम. एन. ओ. को राजनैतिक अवधारणाको बारेमा प्रशिक्षण प्रदान गर्नुभएको थियो । प्रशिक्षणको दौरानमा उहाँले अबको निर्वाचनमा आफ्नो हक, अधिकार र अस्तित्व प्राप्तिको लागि भाले चिन्हमा मतदान गर्न आव्हान गर्नुभयो । स्थानीय लोक समुदायहरुको सौहार्दपूर्ण उपस्थितिमा सम्पन्न उक्त कार्यक्रम नगर सचिव रामचन्द्र गुरुङले सञ्चालन गरेका थिए ।