काभ्रे/ मंगोल नेशनल अर्गनाइजेशनको गाउँ गाउँ जाउँ, मूलबासी मंगोल जगाउँ, अस्तित्व बाचाउँ भन्ने मूल नारालाई आत्मसाथ गर्दै काभ्रे, तेमाल गाउँपालिका सभाको आयोजनामा एकदिने प्रशिक्षण कार्यक्रम सम्पन्न भएको छ ।

नर बहादुर तामाङको सभाध्यक्षतामा सम्पन्न कार्यक्रमको प्रमुख आतिथ्यता संगठनको केन्द्रीय सर्वोच्च सभाका सदस्य रिन्छेन तामाङले गर्नु भएको थियो । कार्यक्रममा रसुवा जिल्ला सभाका अध्यक्ष बिकास तामाङ, काभ्रे जिल्ला सभाका अध्यक्ष कमल तामाङ, मंगोल गायक कृष्ण तामाङ लगायतको उपस्थिति रहेको थियो ।

कार्यक्रममा प्रमुख अतिथी तामाङले सभ्य समाज र परिस्कृत समाज निर्माण गर्नको लागि युग पुरुष अमर ड.गोपाल गुरुङ ज्युको वैचारिक क्रान्तिमा ऐक्यबद्दता जनाएर आगामी निर्वाचनमा एम एनओलाई चिनेर मत दिनुपर्ने कुरामा जोड दिनु भएको थियो । अतिथी द्वयले मंगोल समुदायको वास्तविक ईतिहास र एम एनओको भुमिकाको बिषयमा प्रकाश पार्नु भएको थियो । कार्यक्रम दुर्गालाल तामाङको स्वागत मन्तब्यबाट सुरु भएको थियो ।