खोटाङ/ खोटाङ जिल्ला अन्तर्गत पर्ने साकेला गाउँपालिकामा  मंगोल नेशनल अर्गनाइजेशनको गाउँसभा गठन भएको छ । 
  १७ मार्च २०२२ का दिन साकेला गाउँपालिका वडा नं. २ स्थित साकेला पार्कमा सम्पन्न एक प्रशिक्षण कार्यक्रमबिच उक्त गाउँसभा गठन भएको हो । उक्त कार्यक्रममा स्थानीय मंगोल समर्थक दिल प्रेम राईको सभाध्यक्षता एवं संगठनका केन्द्रिय सदस्य चन्द्र वान्तवाको प्रमुख आतिथ्यता रहेको थियो । विशेष अतिथिमा १ नं प्रान्तीय सभा सदस्य अनिल राई रहनुभएको थियो भने अतिथिमा  प्रवास सभा मेघालय,भारतका सदस्य
जितबल ( जे. बि.) राई रहनुभएको थियो ।
 कार्यक्रममा प्रमुख अतिथि चन्द्र वान्तवाले एम. एन. ओ. को राजनैतिक अवधारणा र उद्देश्य, नेपालको राजनीतीमा एम. एन. ओ. को आवश्यकताको बारेमा प्रष्ट्याउँदै अबको समय मूलबासी मंगोलहरुले आफ्नो अस्तित्व, अधिकार र देशको समुन्नतिको निमित्त भाले चिन्हमा मतदान गर्नुपर्ने कुरा जगजाहेर गर्नुभयो  । कार्यक्रमकै बिच दिल प्रेम राई को अध्यक्षतामा २२ सदस्यीय एम. एन. ओ. साकेला गाउँ सभा गठन भएको हो । स्थानीय लोक समुदायहरुको सौहार्दपूर्ण उपस्थितिमा सम्पन्न उक्त कार्यक्रम भोगेन्द्र राईले सञ्चालन गरेका थिए ।