मोरङ/ मोरङ जिल्लाको धनपालथान गाउँपालिका -२ आनन्द चौकमा मंगोल नेशनल अर्गनाइजेशन मोरङ जिल्ला सभाको सक्रियतामा मंगोल राष्ट्रवाद सम्बन्धि एकदिने खुल्ला प्रशिक्षण कार्यक्रम सम्पन्न भएको छ । आज २० गते बुधबार भएको उक्त प्रशिक्षण कार्यक्रममा स्थानीय मंगोलप्रेमी आनन्द मण्डलको सभाध्यक्षता रहेको थियो । त्यसैगरी कार्यक्रममा प्रमुख अतिथी तथा प्रमुख प्रशिक्षक संगठनका केन्द्रीय सदस्य सुरज फोम्बो रहनु भएको थियो ।

     एमएनओ पथरी नगर सभा अध्यक्ष टेकबहादुर मगरको स्वागत मन्तव्य संगै शुरुभएको उक्त प्रशिक्षण कार्यक्रममा आगामि मंसिर १४ गते हुन गईरहेको स्थानीय तहको उप निर्वाचनलाई लक्षित गर्दै संगठनबारे फोम्बोले प्रशिक्षण प्रदान गर्नु भएको थियो । त्यसैगरी मानव अस्तित्वबारे प्रष्ट पार्दौ फोम्बोले हाम्रो मानव अस्तित्व मंगोल रहेको कुरा बताए ।

उक्त प्रशिक्षण कार्यक्रममा एमएनओ सुनवर्सि नगर सभाध्यक्ष महेन्द्र राजवंशीले पनि आफ्नो मन्तव्य राख्नु भएको थियो । एमएनओ लोकतन्त्रलाई आफ्नो पहिलो पक्षधर मान्दै देशको दिगो विकास र उन्नतिको निमित्त लोकद्वारा नै मनोनीत बनिएर सत्तामा पुग्ने सामर्थ्य राख्दै चुनावमा भाग लिने संगठन भएकोले आगामी मंसिर १४ गते हुने चुनावमा पनि धनपालथानमा संगठनले उम्मेदवार उठाउने तयारी भईरहेको मोरङ जिल्ला सभा अध्यक्ष बिकेन बान्तावाले मंगोल भिजनलाई जानकारी गराउनु भयो । कार्यक्रममा एमएनओ सुनवर्सी नगर सभा सचिव रविन्द्र श्रेष्ठको पनि उपस्थिति रहेको थियो ।